公視新聞網 https://news.pts.org.tw/article/746581
臺南民間拚台語友善 市府文宣煞用錯誤台文
發布時間：2025/4/11 19:15 更新時間：2025/4/11 20:09
李晨宇 / 地方報導
https://www.youtube.com/watch?v=j790OgevJrg
為著欲恢復母語的光景，台南基本款協會舊年開始推動「台語友善行動」，結合店家打造
通講台語的生活環境，這陣已經有30間店頭響應。毋過民團也發現，其實市府的文宣頂懸
定出現毋著的台文字，in嘛建議市府愛設立「台語委員會」做諮詢單位，tshuā頭使用正
確的台文。（此則新聞標題、內文為臺語文。）
入去健身房上團課，教練講的毋是華語，是用台語來指導。像箠仔弓、夯石碾定著有人會
做這款運練，臺南這間健身業者是響應「台語友善行動」，全程用台語來教課。
熊熊舉起頭家飛熊講：「阮的先輩攏有用台語咧教，所以我就想講愛共遮的物件留落來，
想講共遮的物件傳落去。」
毋但健身房，這間冊店嘛加入推廣，囥台語冊予人看，逐個月底閣辦台語讀冊會。頭家講
，近來有濟濟少年人願意行入台語冊店來，只要頭家先開喙講，人客嘛會加減用台語回應
，沓沓仔形成一款文化的氣氛。
南渡策室x無有為冊店共同創辦人廖俊凱講：「（少年人）平常時的對話，in大部份攏是
聽有，沓沓講，阮嘛袂講共in趕、共in笑，創造一个友善的環境按呢。」
這項計畫是由「台南基本款協會」發起，in招各行各業加入「台語友善店家」行動，對舊
年起頭先針對餐飲店、後來旅館、動物病院攏來響應，到今超過30間店頭加入。台語雖然
已經是國家語言，毋過民間煞發覺市府的文宣猶是定出現「揣頭路」、「tshit-thô」、
「食頭路」、猶有「上安心」等等華、台語烏白用的狀況。民團認為，市府應該愛tshuā
頭用正範台文字。
臺南市台語文化班學會理事長黃良成講：「過去的政府就是無這个母語教育，以致使這馬
嘛毋是in刁工按呢的毋著，根本就是愛設立一个台語委員會，予in有一个諮詢的單位兼一
个窗仔口，通予in去請示、去請問、去諮詢。」
臺南市政府發言人田玲瑚講：「市府的文宣通常委外交予專業來設計，部份的廠商干焦參
考媒體、網路社群，定看著的台語詞彙，後續會要求執行的廠商愛謹慎用正確的台文字。
」
政府若欲真正復振母語，就愛佮民間做伙來推sak，市府回應，後續會閣較謹慎，嘛講會
共同協助保存和傳承台語文化。
曹詠涵/編輯