公視新聞網 https://news.pts.org.tw/article/829351
旗津漁港火燒船 至少6隻著火、其中3隻全毀
https://www.youtube.com/watch?v=8mGXs-CY550
發布時間：2026/9/30 20:20 更新時間：2026/9/30 20:20
許嘉茹 邱紹揚 高雄報導
高雄旗津漁港今仔日（9/30）中晝傳出火燒船意外，烏煙衝起去天頂，幾若公里外攏會當
看著。民眾講，是停佇咧港內的漁船仔雄雄燒起來，因為船仔停甲密密，有的袂赴徙走，
上無有6隻船tòo著火，其中3隻全部燒了了。佳哉無人著傷，詳細的著火原因閣愛調查。
(這條新聞標題、內容是台文)
吳征揚/編輯
=====
目擊民眾：
後壁彼索仔傷燒矣，無法度放啦，你人愛先出來（爆炸聲）。
看著火勢湠遮緊，逐家攏著急欲共船仔徙走。高雄旗津漁港中晝十二點半，一隻停咧港內
已經無咧掠魚的船仔，雄雄著火燒起來，玻璃纖維的船殼、船頂，猶閣有柴球，致使火愈
燒愈大，毋但燒著隔壁船，縛船的索仔嘛燒斷去，風若搧，著火的船仔綴湧流去對面，袂
赴徙走的船仔去tòo著火，船頭燒甲烏嘛嘛。
船主：
消防隊啊，欸，共伊喝一下，你共伊喝一下，幫忙一下啦，遐閣燒起來矣。
目擊民眾：
這馬是燒著第六台矣，頭前三台較細，（燒著）船頭爾爾，已經離開矣，有兩隻（船）全
毀矣。
這場火燒船意外，消防佮海巡齊出動，一个佇岸頂，一个對海面濺水、拍火，開點外鐘才
共火拍化。消防表示，有三隻船仔燒甲真食力，佳哉無人著傷，其中上頭起先著火的彼兩
隻船，已經無咧掠魚。船長看著船仔燒了了，氣怫怫講，當初船牌共沒收去，干焦留船殼
予伊。伊無錢通拆，嘛揣無位通拆，這馬出代誌矣，伊嘛無才調處理。
船主 莊先生：
船牌共人沒收起矣，人船殼欲按怎（處理），著毋著，人那有法度啦，啊你抨佇遐，我就
共怹講矣，你抨佇遐另工若著火起來咧，到拄到矣，到這陣已經十幾年矣，著火矣，啊看
啥人欲處理啊。
港務消防大隊高雄港隊隊長 吳俊毅：
這馬目前就是兩隻廢棄的，一隻是有人的，（拄開始燒的時，頂懸是毋是有人咧煮物件）
，這部份無啥清楚，愛等阮後續的調查。
火燒船的烏煙衝去天頂，就連幾若公里遠的所在攏看現現，有民眾講，敢若是有人咧船頂
煮物件造成火燒，不而過發現火燒的外籍移工講，是船殼邊仔的船仔家己燒起來的，到底
著火的原因是啥，閣需要等待消防的調查結果。