公視新聞網 https://news.pts.org.tw/article/828328
國家影視聽中心 公開日本時代臺灣鐵路影片
https://www.youtube.com/watch?v=cDp9xIjhBeI
發布時間：2026/9/23 20:52 更新時間：2026/9/23 20:52
呂尚儒 莊浚佑 / 綜合報導
臺灣作家楊双子的小說《臺灣漫遊錄》，故事背景就是日本時代，兩个主角透過坐火車四
界去食美食，咧旅途當中展開殖民者佮被殖民者之間的辯證。 國家影視聽中心最近公開
「日治時期台灣鐵道」4支系列影片，影像紀錄彼陣的車頭、糖廠當時的經濟作物金蕉佮
木瓜，中心表示對遮的影像通看著帝國按怎看待殖民地，毋過閣較重要的是咱按怎揣著咱
臺灣人的集體記憶，佮歷史解說權。（新聞標題、導言為台語文）
鄭宇汘/編輯
=====
坐火車會當看著沿途的風景，像彼陣的臺北車頭、工廠，當時的經濟作物弓蕉佮木瓜，抑
有好 tshit-thô 的所在，這是國家影視中心最近公開的日本時代臺灣鐵路的影片。執行
長表示，火車佇當時是真重要的現代化工程，影片除了顯示帝國的治理成果，嘛教育民眾
坐火車的公共禮數，嘛有推展殖民地觀光的企圖，中心嘛對小說《臺灣漫遊錄》的角度切
入，希望透過影片會當予民眾結合小說描寫的鐵路景緻。
國家影視聽中心執行長 杜麗琴：
當時坐火車的毋但男性，看起來怹嘛不只是公務的目的，可能猶有觀光的目的咧內底，《
臺灣漫遊錄》內底所描寫的這个情境內底，伊的影像動態化，可能會當對這內底得著一寡
影像的啟發。
中心嘛邀請專家對鐵道影片進一步研究佮分析，發表咧電影期刊《電影欣賞》內底。期刊
指出一九二○年代開始有旅行團佮票選臺灣八景十二勝等等，促進臺灣風景對帝國領土轉
向觀光發展，影片的背景嘛佮當時一九三五年臺灣總督府透過始政四十年記念臺灣博覽會
欲展示殖民地帝國成績有關。
國家影視聽中心研究出版組編輯 朱卿鋒：
袂當真明確知影出品資訊是啥人，當然有兩支是鐵道部彼就是官方，（呈現）臺灣除了是
一个富足的殖民地以外，伊嘛有觀光佮文化的潛力，因為伊其實影片當中是有翕臺灣人的
，所以當然有一个殖民者的角度，無夠深入，但是因為伊是宣傳影像，然後阮攏感覺會當
保留這寡影像真珍貴。
中心表示透過這系列日本時代臺灣鐵路影像，予民眾會當看著背後的政權脈絡，來揣著咱
臺灣人的集體記憶佮歷史的解釋權。目前影片攏囥佇官方 YouTube 面頂，嘛期待透過傳
播、討論，會當發現愈濟當代的觀點。