公視新聞網 https://news.pts.org.tw/article/782717
基隆欲編預算、人力 過年前成立台語委員會
發布時間：2025/11/24 19:15 更新時間：2025/11/24 23:55
呂尚儒 王志剛 / 地方報導
https://www.youtube.com/watch?v=QW96__NxMZQ
今年台語團體積極呼籲中央和地方，應當設立「台語復振委員會」，也發起連署行動，頂
日仔高雄市長陳其邁已經拍頭陣簽署中央的連署。啊若地方層級的部份，基隆也有好消息
，經過市議員咧議會提案，市長謝國樑咧11/19已經答應欲編預算、人力來做，拍算舊曆
過年前欲佇文觀局下底成立「台語委員會」。（新聞標題、導言及內文皆為台語文）
基隆市文觀局長 江亭玫(2025.11.19)：「台語委員會內的規章制度當咧訂。」
基隆市議員 張顥瀚 vs. 基隆市長 謝國樑(2025.11.19)：「（會當共咱報告一下，咱這
馬規个進度會使無？）按呢我建議是按呢，咱佇舊曆過年前麻煩你共成立予好，開頭一改
的大會（討論工作）。」
11/19佇基隆市議會咧總質詢的時，針對「台語委員會」敢會設立的問題，市府表示tsín
已經咧訂規章制度，市長謝國樑嘛答應編預算、人力來做，拍算舊曆過年前欲成立、屬佇
文觀局下底，未來通辦台語活動。提案的議員張顥瀚表示，伊希望這个委員會，通對台語
家庭和復振的政策落實有幫助。
基隆市議員 張顥瀚：「咱紲落來嘛是希望講邀請一寡，民間的團體，毋管是台語路抑是
足濟咱的民間團體，做伙來逐家想看覓講，這是全臺灣頭一个委員會，咱透過遮的部份會
當推動閣較濟政策的一寡方向。」
台語政策推動聯盟自10月底發起「台語復振委員會」連署，呼籲中央和地方應當做陣拍拚
，頂禮拜四高雄市長陳其邁已經拍頭陣參與中央的連署，今地方的部份、基隆已經拚出成
果。毋過民團呼籲相關的台語委員會莫干焦是為著辦活動才做，嘛建議各縣市也通照國家
語言發展法，來推動台語成做地方通行語，起造台語環境。
台語政策推動聯盟召集人 許慧盈：「怹除了講有台語復振委員會以外，怹嘛會使根據國
家語言發展法內面的規定，就是講縣市政府伊嘛會使透過怹的這个民意單位，若通過了後
，會當用怹彼个所在上濟人使用的語言，來做怹這个地方的這个通行語。」
民團表示目前已經有231个團體和公司、佮3千外个民眾參與連署，嘛希望設立台語復振委
員會的層級愛會當迒部會溝通，莫干焦限制佇文化教育單位下底，按呢台語環境的推動才
有通全面。
記者 呂尚儒 王志剛 基隆報導
唐嘉良/編輯