公視新聞網 https://news.pts.org.tw/article/782215
高市議員籲中央設台語專責單位 陳其邁連署支持
發布時間：2025/11/20 19:15 更新時間：2025/11/20 19:47
許嘉茹 邱紹揚
https://www.youtube.com/watch?v=bIETyZ7om8c
高雄有超過百萬的台語人口，這陣閣有台語實驗小學，毋過經費煞攏是市府提供，高雄市
議員張博洋認為，中央一定愛有台語的專責單位tshuā頭。伊佇議會質詢就提出成立台語
復振委員會的連署書，予市長陳其邁連署，陳其邁簽名支持以外嘛表示，毋管啥物語言，
中央愛用國家的力量，予怹仝款的尊重佮保護。（新聞標題、導言及內文皆為台語文）
高雄市議員 張博洋:「做為百萬台語使用人口的城市，咱的高雄市長，市長是毋是會當支
持成立，佇中央有1个台語的專責委員會」
提出特別做的連署書，愛市長陳其邁針對成立台語復振委員會來表示意見。高雄市議員張
博洋20質詢提出，高雄這陣有全國第一間的台語實驗小學，毋過所有經費攏是地方教育局
家己出的，若佮有中央單位支持的客語、原住民實驗學校比起來，毋但經費有差別，嘛有
oh延續的風險，張博洋認為，中央必須愛成立台語專責單位來頭推sak。
高雄市議員 張博洋:「台語是按怎愈來愈少人咧用，因為按怎，因為伊無彼个使用環境，
是按怎無彼个使用環境，因為伊無佇工課頂懸去予人使用，所以咱的台語必須愛有，一个
專責單位佇中央的時陣，伊會創造台語的就業人口，伊會創造台語的相關研究，伊會創造
台語相關的媒體環境，咱才有法度來繼續予這个語言，佇台灣予人保存」
針對議員的質詢，市長陳其邁是先共連署書收起來，會後才正式簽名。陳其邁表示，有人
講母語踮厝學就好，這是毋著的。若無語言就無法度傳承文化，每一種語言攏愛受著公平
的對待佮尊重，伊支持中央愛有專責單位來推sak台語文的發展。
高雄市長 陳其邁:「(所以你支不支持中央愛要有專責單位 市長)這咱當然向望中央嘛會
當用國家的力量，毋管是對著各種的 咱國家的語言，予伊仝款的尊重佮保護」
高雄市打狗台語文促進協會理事長 鄭智程:「復振語言毋是干焦是學校的代誌，這嘛包括
講咱傳播媒體，數位科技 公共服務 甚至是家庭教育，所以咱這个委員會級數就愛有夠，
才通整合跨部會的資源，予台語政策通有符合，咱國家語言發展法的精神，才有這種長期
10冬20冬的思考」
毋但要求市長愛表態，張博洋強調，高雄有超過百萬的台語人口，欲參選高雄市長的人，
攏愛提出台語的推sak政策，向中央爭取成立台語委員會。
鄭安琪/編輯