公視新聞網 https://news.pts.org.tw/article/777787
全臺第一間台語實驗小學 北嶺國小開觀摩會
發布時間：2025/10/23 16:01 更新時間：2025/10/23 19:58
許嘉茹 邱紹揚
https://www.youtube.com/watch?v=rTbFMvdAqSI
高雄路竹的北嶺國小，114學年度正式成做全國頭一間台語實驗小學，九月開學到今，學
校經過兩個月的推sak，今仔日也特別開觀摩會，目前學校大部份老師是台語華語雙語教
學，也有專業台語老師協同上課，向望浸水式教學環境，予台語對教室行入生活。（新聞
標題、導言、內文為台語文）
高雄市北嶺國小老師 曾詩賢:「你拄才有偷啉無，無，你有偃倒無，無」
老師用台語教數學、問問題，臺跤的二年仔囡仔嘛用台語應，高雄路竹的北嶺國小，自今
年2月開始試sak用台語教冊，九月份正式誠做台語實驗小學，目前除了國語、英語這兩項
語言課，無用台語上課，其他親像數學、社會、生活健康甚至是體育課，攏會當聽著老師
囡仔咧講台語。師生經過這半年的浸水式教學，台語攏越講越好。
高雄市北嶺國小六年級 薛同學:「台語課上好耍（為啥物)，因為有當時考試煞會當看影
片」
高雄市北嶺國小二年級 王同學:「（你平常時上佮意做啥物)畫圖佮運動，（做啥物款的
運動)棒球」
高雄市北嶺國小老師 曾詩賢:「聽家長講這馬寫數學的時陣，喙會沓沓仔 會踅踅唸，一
个兩个三个四个，就是會唸出喙 唸出聲，家長就會感覺誠趣味呢，阮囝會當開始講臺語
矣」
北嶺國小成做全國頭一間台語實驗小學，無論是學界抑是家長攏有質疑佮建議。校長講，
這擺的觀摩會毋是成果展現，是向望予外界瞭解學校實際的做法，校長強調,老師用台語
上課，若搪著囡仔台語聽毋捌的,嘛會用華語閣解釋，袂因為用台語上課都去影響囡仔的
學習。
高雄市北嶺國小校長 蘇恆欽:「用台語來教數學，用台語來教社會，按呢是毋是影響著囡
仔的成績，其實這點就是講嘛欲請家長來放心，毋管是用佗一種語言來教學科，阮重視的
就是學科的智識」
這陣學校有3位台語專業師資來加入協同教學，幫助學科老師來備課、教冊。有老師講，
欲學語言，環境誠重要，有囡仔對原本攏袂曉，這陣也會使講幾句，像伊經過這半冬的教
課，就予伊家己嘛共台語閣抾倒轉來。
鄭安琪/編輯