公視新聞網 https://news.pts.org.tw/article/759671
丹娜絲掃佳冬光電平台 塭豐海堤全破枋仔架
發布時間：2025/7/7 19:15 更新時間：2025/7/7 22:53
許猛 / 地方報導
https://www.youtube.com/watch?v=bK4qEylU3uY
高雄佮屏東這擺毋但因為風颱，致使一寡所在閣淹水，佇屏東佳冬外海，一搭海上光電平
台的試驗計畫，嘛受著風颱損蕩，規个平台去予海湧摃甲散了了，造成佳冬塭豐駁岸倚大
海一公里內攏是破架仔，已經礙著漁船作業，屏東縣府除了要求停工，也限業者48點鐘內
愛清予好勢。（新聞標題、導言及內文皆為台語文）
海湧一陣接一陣，屏東佳冬的塭豐海堤外口，四界攏是這款烏色的架仔，這是經濟部核定
的海上光電平台試驗計畫，因為袂勘得風湧，規个平台散了了，佇海埔海上攏是平台的破
殼，縣府講，計畫內底只有平台，無囥光電枋，風颱前有要求業者愛做好固定，想袂到風
颱大湧損蕩，縣府佇初七已經要求業者停工，而且48點鐘內愛將遮的破殼清除好勢。
屏東縣農業處長 鄭永裕：「廠商清除好勢了後，愛重提報相關一个施工精進的計畫，佇
猶袂經過阮審查，通過核可進前，請怹先停止施工。」
除了大風湧以外，風颱雨也予屏東內埔佮新園地區一寡仔地勢較低的所在出現淹水災情，
因為排水系統無好，有的所在猶閣淹甲跤後肚懸，雖罔民眾講淹慣勢矣，毋過猶是向望水
會當趕緊退。
新園居民：「風颱過後，透早起來，就看著厝頭前像細條溪仔仝款。遮的排水就無蓋好，
算講便若落大雨，就是這馬水流入去，落尾伊會閣倒積出來按呢。」
風颱天淹水的猶閣有高雄旗津的上竹里。因為中區污水處理廠的抽水管煏管，予上竹里附
近50戶的徛家攏淹水，上深的有40公分，民眾原底攏當做是雨傷大，一行出門才知影，是
汙水處理廠的水倒灌出來。
旗津居民：「傷譀矣，痟譀矣。」
另外桃源區的荖濃溪暴漲，溪水參塗石，共勤和到復興段的涵空便道沖害去，佳哉因為事
先封路管制，無發生意外，公路局甲仙工務段表示，已經先開放復興三里的居民，先對梅
山口彼爿出入，目前的搶修會先以緊急備災通道為代先，上緊初8下晡五點開放通行。
記者 許嘉茹 許猛 邱紹揚 高雄屏東報導
唐嘉良/編輯