公視新聞網 https://news.pts.org.tw/article/758631
內政部7月新制 防空避難空間納入安全檢查
發布時間：2025/6/30 19:15 更新時間：2025/6/30 20:36
許嘉茹 邱紹揚／高雄報導
https://www.youtube.com/watch?v=vaa9E8GQrO0
國際地緣風險升懸，防空避難空間七月開始會有大稽查，針對五百人以上的避難所，內政
部對7/1開始會共「出入口的通道」，「照明設備」佮「是毋是有積水」等等的問題，正
式列入公安檢查項目，建管處表示，稽查了後若是無改善，上懸會當罰30萬箍。（這條新
聞標題、前言和內文是臺語文。）
壁頂貼著避難所的指示牌，欲共逐家講，若拄著緊急狀況，會當走去佗位覕，毋過若是親
像按呢，避難空間佮逃生的出入通道攏予人囤物件，甚至規个避難所已經予改做餐酒館佇
營業，萬一若是真正愛用著，欲叫民眾如何是好。行政院最近針對全國一萬八千外个防空
避難所進行全面盤點，而且對七月初一起嘛有新制度，將避難所的照明設備、出入口通道
等等的問題攏納入公安檢查項目。
高市建管處副處長余俊民講：「新制上路了後，這塊就是有增加防空避難室，伊必須愛列
入公安申報。公安申報的部份就是，佇避難所的出入口伊必須愛是通的，而且防空避難室
袂當有積水，猶閣有就是伊愛有基本的照明設備。」
建管處表示，目前佇高雄避難所，上濟的違規猶是囤物件，這馬新制上路，將避難所應該
愛有的設備佮空間攏列入巡查的項目，建管處針對無仝類型的建物會分別有一年、兩年、
四年的固定巡檢，另外佇警察局逐年也會去各分局抽查，針對建物的使用執照、面積等等
做審核，若有需要，嘛會會同相關機關實地勘查。
高雄市警局民防管制中心股長 黃家民講：「防空疏散避難設施的檢查權責，按照建築法
第77條規定，是屬於建管機關工務局的權責，警察機關會按照市政一體的原則，若有需要
警察局協助，警察局也會會同辦理檢查作為。」
受著國際情勢的影響，中央認為愛強化避難所制度佮災害應變，袂使臨時臨曜才發現物件
袂堪得用。對此建管處表示，除了定期稽查，民眾若是發現避難所有違規狀況，也會當敲
1999通報，in會隨派人去了解。
曹詠涵/編輯