公視新聞網 https://news.pts.org.tw/article/757174
中正紀念堂轉型 文化部規畫改民主教育園區
發布時間：2025/6/20 19:15 更新時間：2025/6/20 22:20
呂尚儒 莊浚佑 / 地方報導
https://www.youtube.com/watch?v=Yes60GdHTNY
中正紀念堂設立的目的，是欲記念威權統治者蔣中正，煞和民主價值相違背，引起真濟爭
議。為著促進轉型正義，文化部昨昏（6/19）佇咧行政院會當中，報告「中正紀念堂轉型
規畫」，拍算欲共伊轉型做「民主教育園區」，嘛得著院長卓榮泰的支持。毋過有民間團
體強調，臺灣既然是民主國家，應當去威權化，無應該繼續共蔣中正銅像tshāi佇遐。（
新聞標題、導言及內文皆為台語文）
臺灣行向民主的過程，咧威權統治之下，所發生的二二八事件和43年的白色恐怖時期，是
臺灣社會真沉重的傷痕。為著促進轉型正義，文化部拜四佇咧行政院「推動轉型正義會報
」會議當中，報告「中正紀念堂轉型規劃」，拍算未來欲轉型做「民主教育園區」，院長
卓榮泰對這項規畫表示支持，嘛向望強化人權和法治價值理念。
文化部長 李遠：「咱繼續推廣咧園區內底的人權教育，譬如講中正紀念堂會當佮國家人
權館，辦一寡國際人權電影節，共中正紀念堂伊原底是威權崇拜的形象，慢慢仔改做是一
个民主人權紀念的所在。」
文化部拍算共這个「民主教育園區」，用來做歷史記憶保存和民主教育推廣。毋過有民間
團體表示，中正紀念堂的性質，和其他不義遺址無仝，是用來紀念獨裁者的場所，民團呼
籲政府，臺灣既然是民主國家，就無應該繼續共蔣中正銅像tshāi佇遐。
辜寬敏基金會董事長 王美琇：「你上重要是彼身（蔣中正）你愛處理，彼身繼續存在就
是對臺灣民主上大的侮辱啊！一年有百萬个觀光客來，你是欲共世界觀光客傳達啥物款的
咱的民主價值？」
文化部表示，相關的規畫拍算上緊7月底進前，經過建議收集、討論修正了會向行政院報
告，短期內會辦理教育推廣活動，深化社會大眾對歷史的了解，擴大社會溝通，後續也會
做中、長期的規畫。抑若針對蔣中正銅像的問題，文化部長表示無論欲徙走抑是繼續留咧
到今猶無結論，毋過未來無排除各種可能。
記者 呂尚儒 莊浚佑 臺北報導
唐嘉良/編輯