https://news.pts.org.tw/article/754711
《成功路上》拚入Netflix排行榜 台語齣登上國際
發布時間：2025/6/5 19:15 更新時間：2025/6/5 22:57
https://www.youtube.com/watch?v=yno5cHBVhQQ
國際串流平台愈來愈時行，臺灣的戲劇也愈來愈有機會徛起去國際舞台。像頂禮拜拄完結
篇的台語戲劇《成功路上》，就櫼入去Netflix的排行榜。《成功路上》的製作人就講，
關鍵就是做出臺灣特色。毋管是華語劇、台語劇，對外國人來講，這就是臺灣的故事；語
言毋是阻礙，顛倒予人知影臺灣閣有台語這个語言。（新聞標題、導言及內文皆為台語文
）
「自你來阮兜無偌久了後，我就感覺你若是我的阿中。」
公視台語台的戲劇《成功路上》，佇頂禮拜大結局，予觀眾看甲目屎流目屎滴。戲劇內底
的男主角建中，因為過了傷過痛苦，面對著老母死去、老爸欠數，意外對現代穿越轉去
1989年，想欲做出改變。
「你校花，哪有可能無人逐？」
這齣戲也拍破逐家對台語戲劇的印象，和台語八點檔無仝，是請偶像劇演員郭雪芙和李程
彬來演出，導演講只要拍片拍了有品質，不管是台語劇抑是華語劇，攏有機會徛起去國際
舞台。
《成功路上》製作人 林知秦：「我感覺對國際來講，聽華語佮台語應該對怹來講無傷大
的差別；可能對怹來講，聽起來會小可仔無仝，嘛趁機會當予怹知影，其實佇華語地區，
就是有無仝款的語言。」
「二林上有名的狐狸精、上大箍的第三者。」
接佇成功路上，後一齣戲劇《拜六 禮拜》，佇6/8就欲播出，仝款是以全台語的方式演出
，三个佇學生時期感情就真麻吉的好朋友，面對欲50歲的人生，有人猶未結婚、有人閣咧
做人的第三者，有人予生活逼甲真忝，干焦想欲轉去厝歇睏。故事發生佇彰化二林鎮，導
演講欲予逐家愛看台語劇，就是愛接近生活，揣著觀眾的共鳴。
《拜六 禮拜》導演 杜政哲：「咱這回的故事，是發生咧彰化二林的所在，所以有足濟葡
萄酒，也有二林國中內底，拍bok-sìn-gù內底的一寡背景。」
文化部拜四舉辦台流來襲記者會，文化部長李遠邀請14齣台劇，將近百位的影視創作者來
到現場，希望會當當面共怹表揚鼓勵，遮濟優秀的影視人才，透過影視作品予世界看著臺
灣，甚至佇國際串流平台有真好的表現，真正實現臺灣的戲劇愈在地就愈國際。
記者鄭亞宣 林郁凱 臺北報導
唐嘉良/編輯