公視新聞網 https://news.pts.org.tw/article/744227
干焦清明才會食潤餅？ 各地頭時間、菜料無啥仝
發布時間：2025/3/27 19:15 更新時間：2025/3/27 23:01
https://www.youtube.com/watch?v=RGROySkJjZ0
便若到清明節前後，賣潤餅佮潤餅皮的店頭，攏會出現排隊的人陣。但是佇臺灣各地頭，
潤餅kauh的餡有淡薄仔精差，食的時間點嘛無仝。tshuā觀眾朋友做伙來了解。（新聞標
題、導言及內文皆為台語文）
用麵粉、水、鹽撋出來的麵粉粞仔，抹佇爐仔頂一時仔的時間，一領潤餅皮就做好矣，這
擔佇清明節前後才有咧賣的潤餅皮的店仔，是在地40年的老擔，頭家講潤餅皮欲好kauh，
大細、厚度攏愛撙節好勢
潤餅皮店頭家 邱炳慶：「阮咧做的時陣愛共揤落去，揤落去的時陣就是咧控制厚度。今
仔日拍（麵粉）粞仔起來伊較虯，所以伊共伊（麵粉粞仔）sak出來的時陣，規个攏真圓
，就控制佮咱（鐵鼎）的面拄仔好是平大張。」
一張潤餅皮，會當變出濟種口味、無仝的食法的潤餅kauh，有人是尾牙食，有人是清明咧
kauh潤餅，食食作家陳靜宜表示，對潤餅kauh嘛會當看出臺灣移民文化的痕跡。
飲食文化作家 陳靜宜：「臺南南部，攏是清明節這个前後咧食的；抑若是臺灣北部尾牙
的時陣咧食這个潤餅。所以講，咱食潤餅的習慣，嘛是會當反轉去，看這个原鄉怹是按怎
咧食的。像同安怹佇舊曆的2月初2、3月初3、佮冬節這3工怹咧食潤餅；像福州是對立春
一直食到熱天，所以怹包的是豆菜。」
作家陳靜宜表示，潤餅kauh綴移民的跤步，傳到臺灣佮其他東南亞國家，潤餅kauh也佇臺
灣落土釘根，除了kauh菜蔬、kauh肉，也有包烏魚子、皇帝豆，甚至發展出kauh塗豆麩佮
冰的食法，發展臺灣味的潤餅kauh。
記者 楊舒晴 彰化報導
唐嘉良/編輯