公視新聞網 https://news.pts.org.tw/article/738359
西班牙藝術家破壞士林慈諴宮廟門 判罰1.5萬
發布時間：2025-02-18 19:15 更新時間：2025-02-18 20:43
郭柏均 林郁凱／臺北報導
https://www.youtube.com/watch?v=8QXdJp4r8pM
有200外年歷史的臺北市市定古蹟-士林慈諴宮的廟門，2023年予一个姓方的西班牙籍人士
提鑢仔搵化學品，共廟門鑢甲落漆。後來予士林地檢署以刑法毀損罪，提起公訴，這幾工
士林地方法院判決出來矣，欲罰這个外籍人士15000箍的罰金，猶通上訴。（此則新聞標
題、內文為臺語文。）
臺北市市定古蹟-士林慈諴宮的廟門，門神的漆面有一部份落漆去，通看著廟門柴頭的原
色。士林慈諴宮龍爿的廟門，2023年8月，予一个西班牙籍姓方的查埔人，提鑢仔佮布，
搵松香水(siông-hiang-tsuí)這寡化學品鑢廟門，鑢甲落漆，士林地檢署認定涉嫌毀損
罪，提起公訴，這幾工士林地院判決，共這个查埔人罰15000箍，目前猶通上訴。
民眾鄭小姐講：「伊無尊重媽祖婆，無好、無好。伊嘛是有啉酒啦。」
士林慈諴宮工作人員邱先生講：「原本遮爾媠的物件，無緣無故就因為外國人毋捌，毋知
影咱門神的重要，門神就代表門面，這馬就是緊急修復的報告書有出去矣。」
士林慈諴宮，閣號做士林媽祖廟，是士林三大古廟之一，創建佇1796年，1864年搬到這馬
的地點，到今超過200年歷史，是臺北市市定古蹟。2023年廟門予人破壞到今，猶未修復
，臺北市文化局指出，廟方已經提出相關的修復程序，猶咧協調廟方、佮藝師的時間來修
復，和相關細節。
臺北市文化局專門委員邱稚亘講：「修復的計畫阮也審查通過，阮就是會佮廟方遮確認講
，到底修復的時程大概是啥物時陣，阮佇過程中也會邀請文資委員到現場去確認，就是相
關的工法、工序，佮進前阮審查通過的計畫是毋是相仝。」
針對士林地院目前的判決，文化局表示，廟方是當咧討論敢有欲繼續上訴。為著避免廟門
閣再予人破壞，廟方已經佇廟門附近圍紅線起來，也有加強巡邏。
曹詠涵/編輯