: 聽滿多人說藏傳佛教是邪教，什麼雙修、人皮鼓、阿姐鼓、人皮唐卡等，但我看滿多高社
: 經地位的信仰這宗教，請問以前的藏傳佛教真的是這麼殘忍嗎？把人活生生作成鼓皮、人
: 皮唐卡？
藏傳敢是邪教？
這我無了解，毋敢烏白講
而且因為中國共匪侵略西藏嘛是事實
傳統西藏閣是政教合一
所以嘛毋知影所聽到的一寡關於藏傳佛教的消息敢是真的？
敢會是中國共匪刁工咧抹烏？
這我真正毋知
無法度評論
所以這篇
干焦講我心中對藏傳佛教較無理解的其中一點就好
我本身是信原始/早期佛教
我的信仰目標是脫離輪迴
因為佛祖教阮輪迴的本質是苦
重點是：緣起、無我、無常
緣起就我個人的理解
是講世間所有的現象攏是有原因的
無彼款無緣無故發生的代誌
所以包括咱人會出現
嘛是因為種種因素
予"色受想行識(五蘊)"暫時結合才產生的現象爾
等時間到矣五蘊分散
就無矣
賰在生時所造的業繼續去輪迴
所以業力當然毋是靈魂
嘛毋是永遠不變的
因此“無我“
這佮傳統印度宗教的理論無仝款
“無常“嘛仝款
所有的現象攏一直咧變
包括個人的身軀自囡仔變大漢閣變老
想法免講矣 本來就變來變去
個人以外的整個世界攏一直變-無常
所以無常是苦
世事無可能永遠攏照“咱的意思“去行
是按怎出現’咱的意思‘’
因為愛
足"愛"就會想欲去控制
去掠
掠袂著就艱苦
就閣實際去做出一寡行為(包括講話)
造真濟業
等此生結束這个業力閣繼續去轉世
袂收煞
所以佛祖教咱
其實苦就是對愛來的
愛的本質就會是苦
按呢修行的重點就真清楚矣
去徹底覺察家己身心狀況
修甲只要貪瞋痴(三毒)的心一出來就隨發現
按呢就有機會袂受伊控制去造(身口意)業矣
轉來到上頭前
藏傳的轉世認證制度
這部分我較無了解
就我所知影的
轉世認證的意思是講
一位高僧往生以後會繼續轉世
而且怹會透過一寡方式
去了解囡仔敢是這位高僧的新一世
按呢佮我所了解的"無我"
敢若無啥仝款？
若講轉世認證制度的重點
是保證高僧的佛法智識佮精神會當傳落去
是按怎愛去確定敢是仝一个人的轉世？
按呢敢是“無我“？
佛教強調無我
是認為“我執“是苦
嘛會予人無法度脫離輪迴
轉世認證哪會感覺是一種“有我“的認證？
若拄著親像中國共匪這款
直接介入藏人轉世
按呢藏人毋就會因此起煩惱-苦矣？
“憑啥是恁中共來講話”？
畢竟我所理解信仰的佛教是“依法不依人“
https://agama.buddhason.org/book/as/as012.htm
所以產生這個疑問
其實閣有其他疑問
毋過這篇已經寫傷長矣
就到遮為止
是講我本身無了解藏傳
佇上頭前有講過矣
若有了解藏傳的先輩看著我的疑問感覺傷基本矣
嘛請莫共我笑 多謝 (≧ω≦)/