我罔講你罔聽嘿!
台灣就是有一陣政治狂熱者，愛煽動人心，
台語煞變成政治工具，
見若講著台語，就是哩相諍
"台語 v.s. 閩南語"
"國民黨"
"外來政權"這類無營養兮問題。
台語上蓋大兮危機，就是民眾對家己兮語言文化無了解，
生活西化兼北京化嘛感覺爽歪歪，無要無緊。
閩南文化予外省人醜化兼獨派切割否認，
閩台文化煞變成眾人欲改造兮怪胎。
我舉一寡例:
囝仔人只知影日本巧虎，毋知虎爺公祖是囝仔人兮守護神，
食飯桌變成北歐風四角桌，毋知台灣較早用圓桌，
食早頓愛食brunch，毋知阿媽較早食糜配豆乳，
諸母愛買丹麥潘朵拉來掛，講阿媽手環倯斃斃。
少年愛去跳街舞，古早是咧跳陣頭，
講話愛喇英語Rap，往過阿公上台致詞是用台語唸四句聯。
基督教敢若較進步文明，宮廟文化逢罵甲(徦，到)臭頭。
欶(吸)大麻敢若較秋，哺檳榔敢若較無水準。
台灣人有影頭殼一空，白癡白癡。
我有丹麥兮朋友，我問伊你敢是信基督教?
伊講伊信維京海盜，厝頭前有安一尊維京海盜像咧收批，
我佮伊講阮兜樓頂神明廳嘛有安一尊南無觀世音菩薩。
小弟是建議咱愛恢復閩南文化，宮廟文化，建立民族自信心，
莫擱予政治人物牽咧四過叩叩行，
程度較懸兮人，愛跳出來教人河洛話按怎寫按怎讀，讀報紙，讀專業文章，
按呢才有可能予民眾感覺台語有前途，毋是用來喇豬屎，搏感情爾爾，
如此台語才創會起來。
若予我做教育部長喔，毋是我咧臭彈，
保證台語創甲好勢溜溜，
羅馬音標，注音符號，漢字攏小寡代誌，
通人會曉寫，會曉讀，擱會曉唸報紙，
蔡在室你敢有聽著?